ချစ်သူရည်းစားဆိုတာ တစ်ယောက်အကြောင်းကို တစ်ယောက်က အသေးစိတ်အကဲခတ်တဲ့ ကာလလို့တောင် ဆိုနိုင်ပါတယ်။ သမီးရည်းစားဘဝတောင် နားလည်မပေးဘူးဆိုရင် လင်မယားဖြစ်လာရင် ပိုဆိုးတော့မှာပေါ့။ ကိုယ့်ချစ်သူဟာ အခုဖော်ပြထားတဲ့ အကျင့်စရိုက်မျိုးရှိလာရင်တော့ လက်လွှတ်မခံပါနဲ့။ တစ်ခါတည်းသာ လက်တွဲဖော်အဖြစ် ရွေးချယ်လိုက်ပါတော့။

(၁) ကိုယ့်ထက် ပိုတော်တဲ့ ရည်းစား

ကိုယ့်ချစ်သူက ကိုယ့်ထက် ပိုတော်တယ်၊ ပိုထက်မြက်တယ်ဆိုရင်လည်း အိမ်ထောင်ဖက်အဖြစ် ရွေးချယ်သင့်ပါတယ်။ ‘စီးတဲ့ရေ ဆည်တဲ့ ကန်သင်း’ ဆိုသလို တက်ညီလက်ညီလုပ်မှသာ အိမ်ထောင်ရေးမှာ အဆင်ပြေမှာဖြစ်ပါတယ်။ ကိုယ့်ရည်းစားဟာ အရည်အချင်းပိုရှိတယ်၊ ဥာဏ်ပိုကောင်းတယ် ပြီးတော့ သွက်လက်တယ်ဆိုရင်တော့ အိမ်ထောင်ဖက်အဖြစ် စဉ်းစားလိုက်ပါတော့။

(၂) ရိုးသားတဲ့ ရည်းစား

တချို့မိန်းကလေးတွေက ချိန်းတွေ့တုန်းမှာတော့ မှာထားတဲ့ အစားအသောက်တွေကို တို့ကနန်းထိကနန်းနဲ့။ “မောင်သိလား ချစ်ကလေ အိမ်မှာဆို ကြောင်စာလောက်ပဲ စားတာ” အဲဒါ ရည်းစားဘဝတုန်းက။ အိမ်ထောင်ကျသွားရင်တော့ ပန်းကန်လုံးနဲ့ အုပ်တာ။ ဆိုတော့ ရည်းစားဘဝဆိုတာ တစ်ယောက်ကိုတစ်ယောက် အရှိကိုအရှိအတိုင်း ဆက်ဆံမှ အဆင်ပြေတာပါ။ လျို့ဝှက်ဆန်းကြယ်တွေနဲ့ ပြည့်နေတဲ့ ရည်းစားကိုတော့ စိတ်မကူးလိုက်ပါနဲ့။

(၃) မျက်နှာထားကောင်းတဲ့ ရည်းစား

ဒီနေရာမှာတော့ ကိုယ့်ရည်းစားက Leonardo DiCaprio လို ရုပ်ချောရမယ်၊ Gal Gadot လို ရုပ်လှရမယ်လို့ ဆိုလိုတာ မဟုတ်ပါဘူး။ ရုပ်ဘယ်လောက်ပဲချောချော မျက်နှာထား မကောင်းရင် ကြည့်မကောင်းပါဘူး။ ရုပ်ကြည့်လိုက်ရင်ကို မျက်နှာက ရှစ်ခေါက်ချိုး၊ သူ့ထမင်းစားနေရတဲ့ ပုံစံမျိုးနဲ့ဆိုရင် ဘယ်လိုမှ အဆင်မပြေပါဘူး။ မျက်နှာကြောတင်းတဲ့ ရည်းစားကိုတော့ အိမ်ထောင်ဖက် မရွေးပါနဲ့။

(၄) ကိုယ့်အားနည်းချက်ကို နားလည်ပေးတဲ့ ရည်းစား။

လူတိုင်းမှာ အားနည်းချက်ကိုယ်စီ ရှိကြပါတယ်။ အဲဒီအားနည်းချက်လေးတွေကြောင့်ပဲ ပိုပြီးတော့ လူသားဆန်လာတယ် ၊ ချစ်စရာကောင်းလာတယ်လေ။ ကိုယ့်အားနည်းချက်ကို အပြစ်လို့မမြင်ဘဲ နားလည်ပေးနိုင်မှ ရေရှည်အဆင်ပြေမှာပါ။

(၅) မိဘနဲ့ အလိုက်သင့်တည့်တဲ့ ရည်းစား။

အိမ်ထောင်ဖက် ရွေးချယ်မယ်ဆိုရင် ကိုယ့်မိဘနဲ့ အဆင်ပြေမှ ကိုယ်လည်း စိတ်မညစ်ရမှာ။ မဟုတ်ရင် မိဘကတစ်ဖက် မိန်းမကတစ်ဖက်နဲ့ ဘယ်ပြေးလို့ပြေးရမှန်းတောင် သိမှာမဟုတ်ဖူး။ လူကြီးတွေအကြိုက်ကို ရေလိုက်ငါးလိုက် ပေါင်းနိုင်တဲ့ ရည်းစားမျိုးကိုပဲ လက်တွဲပါတော့။

(၆) ကိုယ်နဲ့အတူ ရူးမိုက်ရဲတဲ့ ရည်းစား။

ကိုယ့်ရည်းစားက ကိုယ်နဲ့အတူ ပေါကြောင်ကြောင်တွေ လိုက်လုပ်ရဲရင်တော့ သူဟာ ဘဝအတွက် အကောင်းအဆိုးကို မျှဝေလက်တွဲနိုင်တဲ့သူပါ။ အတန်းလစ်ပြီး ရုပ်ရှင်သွားကြည့်တာပဲဖြစ်ဖြစ် မိုးရေထဲမှာ လျှောက်သွားတာပဲဖြစ်ဖြစ် ကိုယ်နဲ့အတူ တလွဲလုပ်နိုင်တဲ့ ရည်းစားကိုသာတွေ့ရင် လက်မလွှတ်လိုက်ပါနဲ့။ အခုဖော်ပြလိုက်တဲ့ အချက်တွေထဲက အနည်းဆုံး (၃) ချက်လောက်နဲ့ ကိုက်ညီမယ်ဆိုရင်တော့ အိမ်ထောင်ဖက်ကောင်းဖြစ်နေပါပြီ။

ကျော်စိုးအောင် (အခရာ)

www.akhayar.com