ပူလောင်လှတဲ့ ဧပြီနွေကို အံတုရင်း ရေကစားရတာလည်း လွယ်လှတာတော့ မဟုတ်ပါဘူး။ အခန့်မသင့်ရင် အားလပ်ရက်မှာ အားမဖြစ်ဘဲ ဒုက္ခသုက္ခမရောက်စေဖို့ အရေးကြီးပါတယ်။ မဟာသင်္ကြန်အတွင်းမှာ ရေကစားကြမယ့် လူငယ်တွေအတွက် အသားအရေ ထိန်းသိမ်းသင့်တဲ့နည်းလမ်းတွေကို ဖော်ပြလိုက်ပါတယ်။

အဝတ်အစားမလုံခြုံတာ

သင်္ကြန်တွင်းမှာ ရေကစားတဲ့အတွက် နေလောင်တာတွေ၊ အသားအရေယားယံတာတွေနဲ့ အဖုအပိန့်ထွက်တာတွေ ဖြစ်နိုင်ပါတယ်။ ဒါ့ကြောင့် နေရောင်ခြည်ကို ကာကွယ်နိုင်ပြီး အရောင်ဖျော့ဖျော့နဲ့ လုံလုံလောက်လောက် ဖုံးအုပ်နိုင်မယ့် အင်္ကျီလက်ရှည်၊ ဘောင်းဘီရှည်ခပ်ပွပွနဲ့ ချည်ထည်တွေ ဝတ်သင့်ပါတယ်။ သင်္ကြန်အတွင်းမှာ အတိုအပြတ် ဝတ်တာက လူငယ်ဆန်ပေမယ့် ပူပြင်းတဲ့ရာသီဥတုကြောင့် အသားအရေထိခိုက်လှပါတယ်။ ရေကစားထွက်ချင်တဲ့ လူငယ်တွေအနေနဲ့ နေအပူချိန်အမြင့်ဆုံးဖြစ်တဲ့ မနက်၁ဝနာရီနဲ့ ညနေ၃ကြားမှာတော့ အနားယူသင့်ပါတယ်။ အဲဒီအချိန်အပိုင်းအခြားဟာ ခရမ်းလွန်ရောင်ခြည်အမြင့်ဆုံးရုံမက လွန်ကဲအဆင့်၁၁ပင် ရှိလာတဲ့အတွက် အရိပ်ထဲတွင် နားနေသင့်ပါတယ်။

နေပူဒဏ်ခံရတာ

ရေပက်ခံထွက်မည့်သူတွေအတွက် နေပူရှောင်ဖို့ ခက်ခဲပါတယ်။ ဒါ့ကြောင့် Sun Lotion ၊ Sun Cream တွေကို နေပူထဲမထွက်ခင် ကြိုတင်လိမ်းသင့်ပါသလို SPF 30 အထိပါဝင်တဲ့ Cream တွေကို ခန္ဓာကိုယ်အနှံ့လိမ်းထားသင့်ပါတယ်။ ရေပက်ခံပြီး ပြန်လာတဲ့အခါ ခေတ္တအနားယူပြီး ရေချိုးသင့်ပါတယ်။ ဘာဖြစ်လို့လဲဆိုတော့ ရေကစားတဲ့အခါ ချောင်းရေ၊ မြောင်းရေနဲ့ မသန့်ရှင်းတဲ့ ရေတွေပါဝင်လာနိုင်တဲ့အတွက် သန့်ရှင်းသွားစေဖို့ ဖြစ်ပါတယ်။

ဆံပင်ဆေးဆိုးတာ

သင်္ကြန်အခါသမယမှာလည်း လူငယ်တွေက စတိုင်ကျစေဖို့ ဆံပင်စတိုင်မျိုးစုံနဲ့ အရောင်ဆိုးကြပါတယ်။ ဆံပင်ဆိုးဆေးတွင် ဓာတုပစ္စည်းများ ပါဝင်တဲ့အတွက် ဓာတ်မတည့်ရင် အရေပြားယားယံရုံသာမက ကင်ဆာရောဂါအထိ ဖြစ်ပေါ်တတ်ပါတယ်။ ဓာတုပစ္စည်းတွေဟာ ဦးရေပြားကို ထိခိုက်ပြီး ဆံပင်မွဲခြောက်တာတွေ၊ ဆံပင်ကျိုးကြေတာတွေ ဖြစ်နိုင်တဲ့အပြင် ကျန်းမာရေးထိခိုက်စေပါလို့ ရှောင်ကြဉ်ကြပါလို့ တိုက်တွန်းလိုက်ရပါတယ်။

ကျော်စိုးအောင် (အခရာ)

www.akhayar.com