ပလတ်စတစ်စွန့်ပစ်ပစ္စည်းပြဿနာ

သဘာဝပတ်ဝန်းကျင်မှာ ပလတ်စတစ်စွန့်ပစ်ပစ္စည်းများလာရင် နှစ်ပေါင်းများစွာကြာတဲ့အထိ မဆွေးမြေ့နိုင်တဲ့အတွက် မြေဆီလွှာ ထိခိုက်စေရုံမက သားရဲတိရစ္ဆာန်တွေ ပျက်စီးစေတတ်တာ အားလုံးအသိပါ။ စွန့်ပစ်ပစ္စည်းတွေကို ပင်လယ်ထဲကို ချလိုက်တဲ့အခါ ရေနေသတ္တဝါများစွာ ပျက်စီးကြရပြီး ရေထုကိုလည်း ညစ်ညမ်းစေပါတယ်။ ဒါပေမယ့်လည်း ပလတ်စတစ်ဘူးသန်းပေါင်းများစွာကို နှစ်စဉ်စွန့်ပစ်နေပါတယ်။ ဒါ့ကြောင့် ပလတ်စတစ်ပစ္စည်းတွေကို Recycle လုပ်တာနည်းပါးတဲ့အတွက် ရေထုမြေထုတွေဟာ ပျက်စီးနေတာပါ။

ဖယောင်းပိုးကောင်တွေက ပလတ်စတစ်ကိုစားတယ်

ကန်တာဘရီးယား ဆေးဇီဝနဲ့ဇီဝနည်းပညာတက္ကသိုလ် ( Institute of Biomedicine and Biotechnology of Cantabria) က ပါမောက္ခ ဖီဒရစ်ကာ ဘာတိုချီနီ (Federica Bertocchini) ဟာ အပျော်တမ်းပျားမွေးသူဖြစ်ပါတယ်။ ဖယောင်းပိုးတွေက ပျားအုံထဲမှာ ဥချပြီးတာနဲ့ ပျားဖယောင်းပေါ်မှာ ရှင်သန်နေကြပါတယ်။ သူမဟာ ဖယောင်းပိုးတွေကို ဖယ်ရှားပြီး ဈေးဝယ်အိတ်ထဲထည့်လိုက်တဲ့အချိန်မှာ ထူးခြားတဲ့ဖြစ်ရပ်တစ်ခု တွေ့ရှိခဲ့ပါတယ်။ အဲဒီဖြစ်ရပ်ကပဲ တစ်ကမ္ဘာလုံးရင်ဆိုင်နေရတဲ့ ပလတ်စတစ်စွန့်ပစ်ပစ္စည်းပြဿနာကို ဖြေရှင်းပေးနိုင်မလားပါ။ အဲဒါကတော့ ဖယောင်းပိုးတွေက ပလတ်စတစ်အိတ်ကို စားပစ်တာပါ။

Wax-Worm-Polyethylene

You May Like : အမှန်တရားဆိုတာ အချိန်ကာလတစ်ခုအထိတော့ စောင့်ရတတ်ပါတယ်

လေ့လာဆန်းစစ်မှုလုပ်လာပြီ

ဖီဒရစ်ကာ ဘာတိုချီနီဟာ ကိန်းဘရစ်တက္ကသိုလ် (University of Cambridge) က သုတေသနပညာရှင် ပေါ်လို ဘွန်ဘဲလီ (Paolo Bombelli) ၊ ခရစ္စတိုဖာ ဟိုဝီ (Christopher Howe) တို့နဲ့ပူးပေါင်းပြီး ဖယောင်းပိုးကောင် ၁ဝဝလောက်ကို ပလတ်စတစ်အိတ်ထဲထည့်လိုက်ပါတယ်။ မိနစ် ၄ဝကြာတဲ့အချိန်မှာ ပလတ်စတစ်အိတ်ဟာ အပေါက်ဖြစ်လာပြီး ၁၂နာရီကြာတဲ့အခါမှာ အိတ် ၉၂မီလီဂရမ်ဟာ ကုန်ဆုံးသွားပါပြီ။ သူမနှင့်အဖွဲ့ဟာ ရောင်စဉ်တန်းကိရိယာနဲ့ ခွဲခြမ်းစိတ်ဖြာလိုက်တဲ့အခါ ပလတ်စတစ်ထဲမှာရှိတဲ့ ဓာတုစည်းတွေဟာ ဖယောင်းပိုးတွေနဲ့ ထိတွေ့တဲ့အခါ ပြိုကွဲသွားတယ်ဆိုတာ တွေ့ရှိရပါတယ်။ ဖယောင်းပိုးတွေဟာ ပလတ်စတစ်ထဲမှာပါတဲ့ ပိုလီအီသိုင်လင်းဓာတ် (Polyethylene) တွေကို ဓာတ်စည်းမဲ့ အီသိုင်လင်း ဂလိုင်ကော (Ethylene Glycol) အဖြစ် ကူးပြောင်းစေပါတယ်။ ဖယောင်းပိုးတွေက ပလတ်စတစ်တွေကို အစာကြေတဲ့အကြောင်းကတော့ သူတို့နေ့စဉ်စားသုံးနေတဲ့ ပျားဖယောင်းနဲ့ ပလတ်စတစ်ထဲမှာပါတဲ့ ပိုလီအီသိုင်လင်းဓာတ်ဟာ ဓာတုဖွဲ့စည်းပုံချင်းဆင်တူတဲ့အတွက် ဖြစ်ပါတယ်။

၂ဝ၅ဝခုနှစ်မှာဆိုရင် ပင်လယ်တွေထဲမှာ စွန့်ပစ်ထားတဲ့ ပလတ်စတစ်အိတ်ရဲ့အလေးချိန်က ငါးရဲ့အလေးချိန်ထက် ပိုများလာမယ်လို့ Ellen MacArthur Foundation က ခန့်မှန်းထားတဲ့အတွက် စွန့်ပစ်ပစ္စည်းပြဿနာကလည်း လူထုကျန်းမာရေးကို ခြိမ်းခြောက်လာပါပြီ။ ဖီဒရစ်ကာ ဘာတိုချီနီတို့အဖွဲ့ကလည်း ဖယောင်းပိုးကိစ္စကို ဥပမာယူပြီး စွန့်ပစ်ပစ္စည်းအန္တရာယ်ကို ဖြေရှင်းဖို့ အမြန်ဆုံးကြိုးစားနေပြီဖြစ်လို့ အောင်မြင်စေကြောင်း ဆုမွန်ကောင်းတောင်းလိုက်ပါတယ်။

ကျော်စိုးအောင် (အခရာ)

www.akhayar.com