ဝမ်းသာစရာကောင်းတဲ့အချက်တစ်ချက်ကိုပြောရရင် ကျောင်းတက်ဖို့ ဝေးလံခေါင်ဖျားတိုင်းတစ်ပါးတွေကိုသွားစရာမလိုတော့တာပါ။ တိုးတက်ပြောင်းလာတာနဲ့အမျှ အင်တာနက်ကနေပဲ စာသင်လို့ရနေပါပြီ။ ပြောရရင်ကွာအိပ်ရာထဲကမထွက်ဘဲတောင် တက္ကသိုလ်တက်လို့ရနေပြီ။ ဒီလောက်ကောင်းတဲ့အခြေအနေဆိုတာ ရှိပါဦးမလား။ Online University တွေထဲမှာမှ Signum University ကသာမန်သင်ခန်းစာတွေထက်ထူးခြားတာတွေကို သင်ပေးတဲ့ တက္ကသိုလ်တစ်ခုပါ။ Signum က စာပေ ၊ သမိုင်း ၊ အတွေးအခေါ်ပိုင်းဆိုင်ရာအမြင် စတဲ့ ကဏ္ဍတွေက ဝတ္တုတွေလေ့လာတာကို အထူးပြုထားတယ်။ ဒါကြောင့် Fantasy ကလည်း သင်ရတဲ့ဘာသာရပ်တွေထဲကတစ်ခုဖြစ်တာပေါ့။ ဒီတော့ဝတ္တုတွေကိုသိပ်ကြိုက်ပါတယ်ဆိုတဲ့သူတွေအားလုံးလက်ခုပ်တီးပြီးခုန်ပေါက်လိုက်ပါတော့။ ကိုယ့်ရဲ့ Facebook Bio မှာ Study Tolkien လို့အတည်ရေးလို့ရပါပြီ။

Sigum University ရဲ့အထူးပြုဘာသာရပ်တွေမှာဘာတွေပါလဲဆိုတော့ Tolkein Studies ၊ Imaginative Literature ၊ German Philosophy၊ Renaissance Literature ၊ Cosmic Fiction of H.P Lovecraft ၊ Chaucer ၊ Modern Fantasy ၊ Mythology of Love and Sex ၊ Science Fiction ၊ The Potter Saga ၊ The Story of Hobbit ၊ Shakespeare ၊ The Inklings and King Arthur စတဲ့ဘာသာရပ်တွေအပြင်တခြားဘာသာရပ်တွေလည်းရှိတယ်။ ပရိုဂရမ်တိုင်းက မာစတာဒီဂရီအနေနဲ့ပေးတာဖြစ်ပြီး ဒီပလိုမာတွေလည်းရှိတယ်။ ကိုယ်ယူတဲ့ဘာသာရပ်နဲ့ စာသင်နှစ်ပေါ်မူတည်ပြီး စာသင်နှစ်က ၂ နှစ်ကနေ ၇ နှစ်ထိ ကြာနိုင်တယ်။ ဒီကျောင်းမှာဆိုရင် Star Wars ကို မေဂျာအနေနဲ့ယူလို့မရပေမယ့် ဘာသာရပ်အခွဲအနေနဲ့သင်လို့ရတယ်။ ဒီတော့ကိုယ့်စိတ်ကြိုက်ဝတ္တုကို ကိုယ်ရွေးပြီးသင်လို့ရမယ်။


ဒီတက္ကသိုလ်က “Personal Enrichment” ကိုလိုချင်တဲ့အလုပ်လုပ်နေပြီဖြစ်တဲ့ကျွမ်းကျင်သူတွေအတွက် ရည်ရွယ်ထားတာဖြစ်တယ်။ မာစတာဒီဂရီဆိုတဲ့အတိုင်း ကျောင်းတက်မယ့်လူတွေက အနည်းဆုံးဘွဲ့တစ်ခုတော့ရထားပြီးသားဖြစ်ရမှာလေ။ ဒီတော့ဒီတက္ကသိုလ်ကိုတက်မယ့်လူတွေက အလုပ်လုပ်နေပြီဖြစ်တဲ့သက်လတ်ပိုင်းတွေပဲဖြစ်ဖို့များမှာပေါ့။ ဒီတက္ကသိုလ်က ဘွဲ့ယူပြီးလုပ်ငန်းခွင်ဝင် ပိုက်ဆံရှာချင်တဲ့သူတွေအတွက် မဟုတ်ဘူး။ ဒီတက္ကသိုလ်ကပြီးလို့ လစာကောင်းကောင်းနဲ့အလုပ်တစ်ခုရမယ်လို့ အာမမခံဘူး။ ဘာလို့လဲဆိုတော့ Harry Potter နဲ့ J.K Rowling နဲ့ပတ်သက်တဲ့အလုပ်အကိုင်ဆိုတာ ရှိမှမရှိတာ။ ဒါပေမယ့် ဒီတက္ကသိုလ်က စာပေကိုအမှန်တကယ်ရူးသွပ်တဲ့ ဝတ္တုတွေကိုအမှန်တကယ်မြတ်နိုးတဲ့သူတွေ ဘယ်တက္ကသိုလ်မှာမှ ရှင်းပြမှာမဟုတ်တဲ့ စိတ်ကူးယာဉ်ဇာတ်လမ်းတွေကို သင်ပေးတဲ့တစ်ခုတည်းသောနေရာဖြစ်တယ်။ Signum University က အမေရိကန်နိုင်ငံ New Hampshire ပြည်နယ် Nashua မြို့မှာရှိတာဖြစ်ပြီး Online ကနေ သင်ခန်းစာတွေသင်ကြားပို့သပေးနေတာဖြစ်ပါတယ်။
ဘယ်သူမှသင်မှာမဟုတ်တဲ့ ဘာသာရပ်ကိုသင်တာကတမူထူးခြားတယ်။ ဒီနေ့ဖြစ်နေတဲ့အရာအားလုံးက အရင်ကစိတ်ကူးတွေကြောင့်ဖြစ်လာရတာ။ ဘယ်အရာမှစိတ်ကူးမပါဘဲနဲ့ အကောင်အထည်မဖော်နိုင်ပါဘူး။

 https://bookstr.com

https://signumuniversity.org

ဒီတော့စိတ်ကူးယဉ်လောကကြီးထဲကို ခြေချခွင့်ပေးမယ့် တက္ကသိုလ်ကို စိတ်ဝင်စားရင်……….အပေါ်က Link တွေမှာဝင်ကြည့်လို့ရပါတယ်။

Piki (Akhayar)

www.akhayar.com